ങുര്‍‌ര്‍

ഉപേക്ഷിക്കപ്പെടുന്നതിന്‍ മുന്‍പ്
പൂച്ചക്കുട്ടിയുടെ ദയനീയമായ നോട്ടമുണ്ട്.
കട്ടു തിന്നത്,
അടുക്കളയിലും കിടപ്പുമുറിയിലും
അപ്പിയിട്ടത്,
വെറിപിടിച്ച് മീന്‍ തിന്ന്
വാതില്‍പ്പടിയില്‍ ഛര്‍ദ്ദിച്ചു വെച്ചത്,
പാലുതിരഞ്ഞ് പാത്രങ്ങള്‍ തട്ടിമറിച്ചത്...
ഒന്നും ഉപേക്ഷിക്കപ്പെടാനുള്ള
കാരണങ്ങളായിത്തീരുമെന്ന്
അതു വിചാരിച്ചു കാണില്ല.
ഉപേക്ഷിക്കപ്പെട്ടതിനു ശേഷവും
ഒരു ങുര്‍‌ര്‍ ഒച്ച അരികില്‍
ചുരുണ്ടുകിടക്കുന്നുണ്ടോ എന്ന്
ഉറക്കത്തില്‍ നിന്നെഴുന്നേറ്റ്
പരതുമ്പോഴാണ്,
അപ്പോള്‍ മാത്രമാണ്,
സ്വന്തം ക്രൂരത ഒരാള്‍ക്ക്
വെളിപ്പെട്ടുകിട്ടുന്നത്...