അധിനിവേശത്തിന്റെ ദൂരം /മൊയ്തീൻ അംഗടിമുഗർ

വാഷിങ്ടണില്‍ നിന്നും

ബാഗ്ദാദിലേക്കു എത്ര ദൂരമുണ്ട്
അതേ ദൂരമാണ്
ഇപ്പോള്‍ ടെഹ്റാനിലേക്കുമുളളത്

പെന്റഗണില്‍ നിന്നും
ഹിരോഷിമയിലേക്കുണ്ടായിരുന്ന ദൂരം
വെള്ളപ്പിശാചിന്റെ
കരങ്ങളാല്‍ ഞെരിഞ്ഞ
ഫലൂജയിലേക്കുള്ള ദൂരം
കാബൂളിലേക്കും,കാണ്ഡഹാറിലേക്കുമുള്ള ദൂരം
അതേ ദൂരം, അതേ അകലം
ആ ദൂരമേ
ഇനി ദമാസ്കസ്സിലേക്കും,സനായിലേക്കുമുള്ളു

ചിറകൊടിഞ്ഞ ഖാര്‍ത്തൂമിലേക്കും
ചേതനയറ്റ മൊഗാദിഷുവിലേക്കുമുള്ള
ദൂരവും ഇപ്പോള്‍ സമംതന്നെ
ഹവാനയിലേക്കും,കാരക്കസിലേക്കും
ഈ നരഭോജിയുടെ കൂര്‍ത്തനഖങ്ങള്‍
നീണ്ട് വരുന്നതും ഇതേ ദൂരത്തിലാണ്

ഒരഗ്നിഗോളം
സ്വന്തം ശിരസ്സില്‍ പതിയുവോളം
ദൂരമറിയാത്ത “അപരിചിത ലോകം“
ഉറക്കം നടിച്ചു കിടക്കും
അവരിലേക്കുള്ള ദൂരവും
അരികിലാകുന്നതു വരെ...