വിധവ തയ്ക്കുന്നു

നസീർ കടിക്കാട്

1

അവളുടെ തയ്യൽ‌യന്ത്രത്തിൽ
തീവണ്ടി
ചൂളം കുത്തി നിൽക്കുമ്പോൾ
നൂലിഴയിലൂടെ ഉടൽ
പാലങ്ങളും തുരങ്കങ്ങളും കവച്ച്
പൂളമരത്തിനു മുകളിലൂടെ
ആകാശത്തേക്കു പായുകയാണ്.

തീവണ്ടിയിൽ
അവൾ അവളോടു മാത്രം
സൂചിമുന പോലെ സൂക്ഷിച്ച്
ചുണ്ടുകളനക്കി
അനേകം അളവുകളുള്ള ശരീരത്തെ
പാഠപുസ്തകത്തിന്റെ ഈണത്തിൽ
ഉറക്കെ വായിക്കുകയാണ്.

2

അവളുടെ തയ്യൽ‌യന്ത്രത്തിൽ
പല പ്രായത്തിലുള്ള കുട്ടികൾ
ഓടിവന്നു
മുറ്റത്തു നിൽക്കുകയാണ്.

ഉടുപ്പു തുന്നാൻ വന്നതാണെന്ന്
മടിയിലേക്കും മാറിലേക്കും
ചാഞ്ഞു വീഴുന്ന മഴയിൽ
ചാരിവെച്ച കുട
മലകളിലേക്കു തുഴഞ്ഞു പോവുകയാണ്.

3

അവളുടെ തയ്യൽ‌യന്ത്രത്തിൽ
വെളുത്ത പതാക
എല്ലാം മറന്നു
പാടുകയാണ്.

കെട്ടിപ്പിടിച്ചു
കിതച്ചോടിയ വിരലുകൾ
താളം പിടിച്ചു ഇലകൾ തൊടുമ്പോൾ
കൈവെള്ളയിൽ മുഖം പൊത്തി
ദൈവത്തിന്റെ വിഗ്രഹം
പ്രാർത്ഥിക്കുവാൻ വിളിക്കുകയാണ്.

4

അവളുടെ തയ്യൽ‌യന്ത്രത്തിൽ
കണ്ണുകാണാത്ത മുലകൾ
ഇമകളിറുക്കി
പ്രാർത്ഥിക്കുകയാണ്.

അളന്നു മുറിച്ച
പല നിറത്തിലുള്ള ആകാശമിതാ
മാറത്തു
കൊളുത്തു തുന്നുകയാണ്
അരക്കെട്ടിൽ
പാവാട തുന്നുകയാണ്.

5

അവളുടെ തയ്യൽ‌യന്ത്രത്തിൽ
ദീർഘനിശ്വാസം പോലെ
കാറ്റ്
ഒളിച്ചിരിക്കുകയാണ്.

മേഘങ്ങൾക്കു കുങ്കുമനിറമെന്ന്
അവൾ അവളോടുമാത്രം
ആകാശത്തെ കണ്ണാടിയിൽ
ഒന്നൊന്നായി അഴിച്ചെറിയുമ്പോൾ
കൊടുങ്കാറ്റുകൾ അവളെ
കുതിരപ്പുറത്തു കയറ്റി
പറന്നു പോകുകയാണ്.