8/1/10
തോറ്റ വിപ്ലവക്കാവടിയാടി മറയുന്നോര്‍
മുഹമ്മദ്കുട്ടി എളമ്പിലാക്കോട്
ഒടിയനും കുടിയനും
മാടനും മറുതയും
പൊട്ടിയും ജാരനും
പുലയാടിത്തെറികളും
കൂമനും കുറുനരിക്കുരവയും
യക്ഷി ഗന്ധര്‍വ ഭൂതഗണങ്ങളു-
മാടിത്തിമര്‍ത്ത
നാട്ടുമ്പുറപ്പാതിരയിലെ
നാട്ടുവെളിച്ചക്കാലത്തിലേക്ക്
വാമനച്ചുവടുവെച്ചെത്തി
കൂറ്റന്‍ വൈദ്യുതി വിളക്കുകള്‍.
ഇല്ലാത്ത കരിംപൂച്ചയെ
തപ്പുവാനെങ്കിലു-
മിത്തിരിയിരുട്ടു പതുങ്ങുന്ന
മാളങ്ങള്‍ പോലും
നക്കിത്തുടയ്ക്കുന്ന
നിയോണ്‍ ദീപങ്ങളുടെ
ആഗോളീകരണത്തേറ്റ
വെളിച്ചം പേടിച്ച്
നാട്ടിരുട്ടു ഭൂതങ്ങള്‍
പൊട്ടിച്ചൂട്ടുകളോടൊപ്പം
തോട്ടിറമ്പിലൂടെ
തോറ്റ വിപ്ലവക്കാവടിയാടി
മങ്ങിമായുന്ന വിശ്വാസത്തി-
നന്തിയൂഴം കഴിഞ്ഞ്
ഭൂതകാലത്തിലേക്ക്
ഒളിച്ചോടവെ
ആരോരുമറിയാതെ
നരിമടയിലവയെ ആവാഹിച്ചു
കുടിയിരുത്തിയ ഞാവലിക്കുന്നേ
കരുതിക്കോ,
കൊലവിളിച്ചാര്‍ത്തും കയര്‍ത്തും
ദൂരെ എന്‍.എച്ചിലൂടെ നിര നിര
വരുന്നുണ്ട് കത്തുന്ന വൈദ്യുതി-
ക്കണ്ണുമായ് മരണ-
സൈറണ്‍ മുഴക്കി ജെ.സി.ബികള്‍
*********************
(വാരാദ്യ മാധ്യമം- 2009 ഡിസംബര്‍ 27)
4 അഭിപ്രായങ്ങൾ:
വരികൾ , ആശയം ഒക്കെ നല്ലത്‌. പക്ഷേ കവിതയായപ്പോൾ എന്തോ കൈമോശം വന്നതുപോലെ. കുറുക്കിക്കാച്ചാമായിരുന്നു .വിഷയം അതുപോലെയായതുകൊണ്ട്‌.
ആശംസകൾ. പിന്നെ ആ തലക്കെട്ട്‌ ?
അജ്ഞാതനാമാവായ വായനക്കാരാ,
ഗുഡ്, വെരി ഗുഡ്... എന്നു ചുമ്മാ പറഞ്ഞു സുഖിപ്പിക്കാതെ ആത്മാര്‍ഥമായി കവിതയെ വിലയിരുത്തിയതു നന്നായി. ബൂലോകത്തില്‍ അപൂര്‍വം ചിലരെങ്കിലും കാവ്യ ഗൗരവത്തോടെ രചനകളെ സമീപിക്കുന്നുണ്ടെന്നതിന് ഇതുതന്നെ തെളിവ്.
നന്ദി
മുഹമ്മദുകുട്ടി എളമ്പിലാക്കോട്
nannaayi
ഒരു അഭിപ്രായം പോസ്റ്റ് ചെയ്യൂ