11/12/07

നീ എന്‍റെ ഭാര്യ

ആലോചനയാണ്
ഇപ്പോള്‍ എനിക്ക് പ്രാപിക്കാനാകാത്ത
ഏതോ അജ്ഞാത കേന്ദ്രത്തില്‍
നീയും ഇതേ ആലോചനകളില്‍ ഇരിക്കുകയാവാം

നിന്നെപ്പറ്റി ആലോചിക്കുന്ന ഒരാളെപറ്റി
ഇതു പോലെ
ആലോചിക്കുന്നു പോലുമുണ്ടാകാം

ഈ ആലോചനയുടെ
ലക്ഷണങ്ങള്‍
എന്റെ വീടിനെ വരെ
ചമയിക്കുന്നുണ്ട്

മീന്‍ മുളകിട്ടു വറ്റിച്ച
കുടുക്ക കഴുകാനെടുക്കുമ്പോള്‍
കല്ലുമ്മക്കായ പൊളിച്ചിട്ട
ഇത്തിളെടുത്തു വന്ന്
കറി പറ്റിപ്പിടിച്ച അടി ചുരണ്ടുന്ന
നീയാകാം ഉമ്മയുടെ പ്രതീക്ഷയില്‍

ദേശ്യപ്പെടലുകളുടെ
കൂറ്റ് പോലും
എത്രയോ കുറച്ചു വച്ചിരിക്കുന്നൂ ഉപ്പ
അകത്തെത്തണ്ട വാതുക്കലെ
വാക്കേറ്റങ്ങള്‍ എന്ന കരുതലോടെ

യഥേഷ്ടം കയറിയിറങ്ങാമായിരുന്ന
അകങ്ങള്‍
അനിയനു നേരെ
ചില വാതിലുകള്‍ വെക്കാന്‍
ആലോചന തുടങ്ങിയ പോലെ അവന്

ചായ കുടിക്കാനിരിക്കുമ്പോള്‍
കറിക്കരിയുമ്പോള്‍
അലക്കാനുള്ളത് പൊതിര്‍ത്തുമ്പോള്‍
ടിവി കാണുമ്പോഴെല്ലാം
ഒരാള്‍ കൂടിയുള്ളതായി
പെങ്ങളുടെ പെരുമാറ്റത്തില്‍

ഞാനുമെന്നെ
വിരിച്ചിട്ടു തുടങ്ങി
എത്ര നിവര്‍ത്തിയിട്ടാലും
പിന്നെയും ചുരുണ്ടു കൂടുന്ന
പുത്തന്‍ പായ
നാലു മൂലക്കും ആളിരുന്നോ
തലയണ കനം വച്ചോ
നിലത്ത് നിവര്‍ത്തിയിടുന്ന മാതിരി

മേപ്പടി
പ്രതീക്ഷകള്‍ക്കൊത്തുയരണോ
അതിനപ്പുറമിപ്പുറം
നിന്നെ വിഭാവന ചെയ്യണോ
എന്നുള്ളില്‍ ഒരു ഭാവന വേറെ

ഇത്രയും
വെളിപ്പെടുത്തിയ സ്തിഥിക്ക്
കൈമാറിയാലോ
ആലോചനകളന്യോന്യം.

7 അഭിപ്രായങ്ങൾ:

umbachy പറഞ്ഞു...

ഓരോരോ
ആലോചനയാണ്.
അവധി അനുവാദമായി,
ഇനി അവളെ തേടി മടക്കയാത്ര.
ഇന്നലെ 28 ആം പിറന്നാളുണ്ടു തനിച്ച്,
ഇനി അതു വയ്യ...!

പ്രിയ ഉണ്ണികൃഷ്ണന്‍ പറഞ്ഞു...

ഇരുപത്തെട്ടാം പിറന്നാളാസംസകള്‍...


അതിനപ്പുറമിപ്പുറം
നിന്നെ വിഭാവന ചെയ്യണോ
എന്നുള്ളില്‍ ഒരു ഭാവന വേറെ

മനോഹരമായ വരികള്‍

Kuzhur Wilson പറഞ്ഞു...

പിറന്നാള്‍.
നീ വന്നിട്ട് 28 വര്‍ഷം
ഇവിടെ വന്നിട്ട് ഒരു വര്‍ഷം ആയല്ലേ.

നല്ല കുറച്ച് കവിതകളെങ്കിലും തന്നല്ലോ
നിനക്ക് ഈ വര്‍ഷം

അഭയാര്‍ത്ഥി പറഞ്ഞു...

nice

umbachy പറഞ്ഞു...

ഞാനിവിടെ വന്നിട്ട് എട്ട് മാസം ആയതേയുള്ളൂ
വത്സാ...,
പ്രിയാ, ഭാവന മാത്രമാണ്.
അഭയാര്‍ത്ഥീ,
കല്യാണക്കാര്യമാണ് അത്ര നൈസല്ലട്ടോ സംഗതി.

Rasheed Chalil പറഞ്ഞു...

:)

വിശാഖ് ശങ്കര്‍ പറഞ്ഞു...

പിറന്നാള്‍ ആശംസകള്‍.

നാട്ടില്‍ പോവുകയാണല്ലെ..?
പെട്ടികെട്ടുമ്പോള്‍ എന്റെ പേര്‍ ഒരു കടലാസിലെഴുതി ഒരു മൂലയ്ക്കിടുക.നിന്റെ നാടും, “ചൂട്” വിയര്‍ത്ത വീടും കാണിച്ച് മടക്കി തരിക.

കവിത നന്നായി.