മുറിവുകള്‍

ആഘാതം ചാര്‍ത്തിയ
വിള്ളലുകളിലൂടെ
ചോര കിനിഞ്ഞിറങ്ങി.

അക്ഷര മണികളും,
വരനൂലുകളും,
വിത്തെടുക്കാന്‍ ഉണക്കി സൂക്ഷിച്ച
പൂച്ചെണ്ടുകളും,
അരികു പൊടിഞ്ഞ്‌
മഷി പരന്ന
മഞ്ഞക്കടലാസുകളും,
ബാലവാടിട്ടീച്ചര്‍ സമ്മാനിച്ച
പൂക്കള്‍ തുന്നിയ തൂവാലയും,
അമ്മ ആദ്യമണിയിച്ച കുഞ്ഞുടുപ്പും,
ചുവന്ന്‌ കുതിര്‍ന്നു.

തേന്‍ പുരട്ടി,
അടുക്കി വച്ചതൊക്കെ
ഒന്നൊന്നായി ചിതറി.

വീണമര്‍ന്നതെല്ലാം
വാരിയെടുക്കാനാവും മുന്‍പേ...
നനഞ്ഞ ഭിത്തിയിലൂടെ
ചുകപ്പ്‌
ആര്‍ത്തലച്ച്‌ ഒഴുകിപ്പോയി.

ആഴ്‌ന്നിറങ്ങും വേദനകള്‍
പറിച്ചെറിയാന്‍ വയ്യ.

മര്‍മ്മത്തില്‍ എയ്ത കൈകളുടെ
ജീവ ഘടന
എന്റേതു തന്നെയാവുമ്പോള്‍...